Szerkesztés alatt
ST 10.5.1.01
Articulus primus, de modo
transitus et mortis Beatae Mariae
Circa primum, de modo transmigrationis et contemplationis quaestiones occurrunt.
Prima est, quo tempore Beata Virgo est mortua in caelum assumpta. Ad quod respondetur, quod si vis scire de anno tres sunt opiniones.
Prima est epiphanii dicentis, quod Beata Virgo post passionem Christi XXIV annis vixerit, et quod quando Christum concepit erat annorum XIV et in XV ipsum peperit et mansit cum eo annis XXXIII, et sic quando obiit Virgo Beata erat annorum LXXII.
Alia est opinio Franscisci de Mayronis, et quorundam sequentium Augustinus libro De mirabilibus sacrae scripturae, ca. XI. dicitur, quod aetas Beatae Virginis fuit LIV annorum, ita quod post passionem Christi tandem per novem annos vixerit.
Tertia, quod communius videtur teneri, opinio est, quod Beata Virgo post Christi passionem XII annis vixerit, et sic citra sexagenarium, vel potius LVIII annum sit in caelum assumpta, cum apostoli totidem annis praedicaverint in Iudea, et circa partes illas, sicut ecclesiastica tradit historia.
Si queras, quare non statim est in caelum assumpta post Christi ascensionem, sed tamdiu derelinquit eam Christus in mundo, respondetur, quod idcirco, ut videlicet doceret apostolos, et illuminaret eos in his, quae ad finem pertinent. Unde quando occurrebant quaestiones determinandae de factis Dei, et morum in ecclesia primitiva ad ipsam recurrebant, et ipsa solvebant. Propterea Lu. II. scribitur: Maria conservabat omnia verba haec, scilicet quae dicebantur, et fiebant circa parvulum Iesum, conferens in corde suo,1 cum his videlicet, quae sciebat praenunciata fore per prophetas, ut postea tempore suo, sicut dicit Beda, posset apostolos iustruere de his, ad quae praesentes non fuerunt circa nativitatem Christi et alia, quae ipsi evangelistae scripserunt ab ea discendo, praecipue Lucas, qui dicitur notarius Virginis. Ideo canitur de ea: Gaude, Maria Virgo, cunctas hereses sola interemisti in universo mundo, scilicet apostolos docendo, qui sua doctrina errores, ubique confutaverunt. Item si vis scire de mense, exquo festum assumptionis cadit in augusto, clarescit, quia Virgo assumpta est mense Augusti sole intrante in signum Virginis. Et hoc congruit mysterio, quia Augustus dicitur ab augendo. Unde Caesar Octavianus, qui imperabat tempore nativitatis Christi, dictus est Augustus, eo quod auxit rem publicam nimium. Hic autem primam victoriam habuit prima die Augusti, et idcirco hunc mensem appellaverunt Augustum, qui prius sextilis dicebatur, eo quod a Martio sextus erat. Et omnes Romani et gentes hanc diem sollemnisabant in memoriam huius victoriae. Quoniam igitur Beata Virgo in hac assumptione auxit rem publicam caelestis gaudii in patria, ipsa quoque Virgo amicta sole, id est gloriae splendore divinae illustrantis totam curiam supernam, figurata est Apoca. XII.: Mulier amicta sole, et luna sub pedibus eius etc.2 Unde congruebat, ut in hoc mense Augusti, quo sol intrat Virgineum signum, ipsa beatissima Mater Dei assumeretur. Item si vis scire, quo die sit assumpta Beata Virgo, respondetur secundum Franciscum de Mayronem in sermone vel tractatu suo De assumptione, quod prout – inquit – colligitur ex his, quae dicunt sancti, ipsa est assumpta in die dominica, quae quidem dies sanctificata est super omnes dies alias, quia isto die angeli sunt creati, et mundus in ipso cepit exordium, illo die Christus natus est, resurrexit et Spiritumsanctum misit. Unde congruum fuit, ut et haec summa sollemnitas assumptionis eo die fieret, haec secundum Franciscum.