PH 000. Prologus
Pomerium de sanctis
fratris Pelbarti ordinis sancti Francisci
[Tabula alphabetica]
In nomine Domini Iesu incipit Tabula contentarum materiarum in hoc volumine sermonum secundum ordinem alphabeti.
[Vide in Tabula originali Pomerii, cum abbreviaturis ’PH’.]
Finit Tabula huius partis secundum ordinem alphabeti.
In nomine Domini incipit Tabula secunda iuxta ordinem sermonum et festorum sanctorum per anni circulum pro parte hiemali.
[Vide in Index sermonum huius voluminis.]
Finit Tabula secunda secundum ordinem sermonum et festivitatum sanctorum, quantum ad partem hiemalem.
Prologus
In nomine Patris et Filii et Spiritus Sancti. Ad laudem et gloriam eiusdem omnipotentis Dei et Domini Iesu Christi ac gloriosae Virginis Mariae, matris eius, necnon Seraphici patris nostri Francisci, ac totius curiae caelestis honorem praemitto, quod fide recta adorans Trinitatem et Redemptorem pro extollenda laude beatorum accurate recollegi tractatum utilem sermonum scilicet de sanctis. Cuius operis Prologus sequitur.
Cupiens ad laudem et gloriam omnipotentis Dei et Domini nostri Iesu Christi ac gloriosissimae Virginis matris eius, omnium quoque sanctorum, praecipue Seraphici patris nostri Francisci in honorem pro aedificatione communis populi aliquos sermones de sanctis per anni circulum recolligere, ut et voto meo de hoc facto satisfaciam, dedi operam, confidens de largissima Dei bonitate, quod meam iuvabit et supplebit insufficientiam. Primum ergo omnium opificis invoco auxilium, a quo est omne bonum, quo praetermisso nullum rite fundatur exordium, ut saltem ex sanctorum dictaminibus faciat complere in hoc opere, quod utile fiat. Sed quoniam iuxta doctrinam Philosophi III. Rhetoricae et Tullii in sua Rhetorica brevitas in sermonibus plurimum placet et delectabilis est auditoribus, eo quod sensus auditus inter omnes sensus est maxime attaediativus. Denique ut beatus Gregorius docet in Pastorali: Secundum qualitatem auditorum debet formari sermo doctorum. Ut ergo pro simplicium capacitate populorum in hoc opere utilius pariter et placibilius procedam, brevi et simplici stylo (quantum libuit pro unaquaque materia curandum) decrevi scribere.
Hoc autem opus statui nominandum, convenienter ut dicatur ’Pomerium sanctorum’, quia nimirum sicut in pomerio varia capiuntur poma et fructus diversorum saporum, sic in hoc opere varietates sermonum de sanctis pro varietate auditorum. Significandum etiam censui, quod certas conclusiones pro qualibet patre sermonis uniuscuiusque aut saltem quaestiones annotavi, quibus agnosceretur, quid pro tali parte illius sermonis contineatur. Ubi tamen pro plebis simplicitate videbitur non expedire ipsas conclusiones, proponere in forma descripta, dimittendae sunt, sed sensus earum simpliciter prosequendus est. Legendas quoque abbreviatas inscripsi, quoad ea, quae videntur pulchriora, ut illis in promptu hic habitis, sarcinas placeat librorum evitare. Scire quoque te volo, quod de Beata Virgine Maria nullum sermonem in hoc opere conscripsi specialem pro hac ratione, quia ex speciali devotione, qua beatissimae Dei matri tenebar, praecipuum librum nomine Stellarium Coronae Beatae Virginis intitulatum iam antea conscripseram, ubi pro singulis festivitatibus eiusdem gloriosissimae Virginis Mariae abundantissimi exstant sermones, pro quibus illuc recurrendum iudicavi, quem librum huic operi coniungendum dignum duxi. Denique in hoc opere pro cuiuslibet sancti festo colendo apud nos quattuor sermones applicare curavi. De festo autem non colendo unicum sermonem feci, et hoc pro praecipuis dumtaxat sanctis, ubi et dum de his placuerit praedicari. Et insuper pro aliis commune sanctorum pluribus sermonibus conscribendum putavi.
Quicquid autem in hoc opere minus bene et insufficienter positum invenitur, modicitati meae deputetur, et rogo, ut venia detur. Si quid vero boni visum fuerit, id non mihi, sed altissimo Deo et Domino Iesu attribuatur, cui in omnibus et per omnia sit laus, honor et gloria in saeculorum saecula. Amen.
Finit Prologus.