Szerkesztés alatt
ST 10.5.1.03
Capitulum tertium primi
articuli de sepultura Beatae Mariae
Tertia contemplatio, qualiter Beata Virgo fuerit post mortem sepulta. Ad quod ex premissorum sanctorum narrationibus et historiis aliorum continuando notatur. Quod postquam haec gesta sunt ceperunt apostoli agere, ut iuxta proceptum Domini, haec arca Domini e monte Syon portetur honorifice ad sepulturae locum, videlicet in vallem Iosephat. Tunc dixit Iohannes Petro: Hanc palmam, scilicet ab angelo allatam ante feretrum petrae portabis, quia Dominus te nobis praetulit, et pastorem ordinavit ovium suarum. Cui Petrus, hanc potius te portare decet, quia Virgo a Domino es electus, et dignum est, ut palmam Virginis Virgo feras. Ego autem portabo cum feretro sanctum corpus. Ceteri autem apostoli fratres mei circumdantes feretrum referant laudes Deo. Paulus autem dixit Petro: Et ego, qui minimus apostolorum sum, portabo tecum. Tunc elevantes feretrum Petrus inchoavit Psalmum: In exitu Israel de Egypto, alleluia.1 Ceteri apostoli cantum prosequuntur. Dominus autem feretrum et apostolos nube protexit, ita quod ipsi non videbantur, sed tantum eorum vox audiebatur. Affuerunt et angeli cum apostolis concinnentes, et totam terram sono mirae suavitatisque odore replentes. Concitati Iudei de civitate ad hanc melodiam, et audientes, quod discipuli Iesu efferunt eius matrem mortuam. Omnes ad arma concurrunt, et se mutuo hortabantur dicentes: Venite, et omnes discipulos occidamus ac corpus istud, quod seductorem portavit, igne comburamus. Princeps autem sacerdotum ira plenus ait: Ece tabernaculum illius, qui nos et genus nostrum conturbavit, et mox manus iniecit, feretro volens illud ad terram deiicere. Qui quia indigne sacrum corpus tangere nititur, ad quod angeli etiam trepidant accedere. Ideo merito manibus privatur. Nam ambae manus eius subito aruerunt, et a cubitus avulsae discinduntur, et lectulo haeserunt, ita ut ad grabatum penderent, et miser ipse nimio cruciatu vexatus lamentabiliter ulularet. Reliquus autem populus ab angelis, qui erant in nubibus caecitate percussus est. Tunc princeps sacerdotum clamans ad Petrum apostolum implorat veniam, et promittit emendam. Cui Petrus post alia verba dixit: Nullatenus misericordiam consequi, poteris nisi accedens osculatus fueris feretrum, et confitearis dicens. Credo in Dominum Iesum Christum, quem ista Virgo in utero portavit, et post partum virgo permansit. Quod cum fecisset, manus unde evulsae fuerant cubitis sunt adiunctem, et pristinae redditus est sanitati. Accipiensque Petrus unum dactilum ex palma dedit illi. Dixitque: Accipe hanc palmam, et pone eam super populum excaecatum. Et quicumque credere voluerit recipiet visum, qui autem credere noluerit, non videbit in aeternum.
Pervenientes igitur apostoli in vallem Iosephat ad praedium Gethsemani invenerunt ibi sepulchrum simile Christi vivifico sepulchro, ubi corpus cum multa reverentia posuerunt, quo munito iuxta illud, ut Dominus iusserat consederunt usque in diem tertium exequias in Dei laude devote celebrando, et orationes faciendo. Ecce vero die, scilicet tertio nubes splendidissima sepulchrum circumdedit, voces angelicae resonant, et ineffabilis odor sentitur, fit omnibus stupor. Et ecce Dominus Iesus descendens cum multitudine angelorum ipsos salutavit dicens: Pax vobis, qui genibus procidentes responderunt, gloria tibi Deus, qui facis mirabilia magna solus. Et dominus. Quid – inquit – gratiae et honoris vobis videtur, ut nunc meae conferam genitrici. At illi: Iustum, Domine, videtur servis tuis, ut sicut tu devicta morte regnas in saecula, sic tu resuscites matris corpusculum, et a dextris tuis colloces in aeternum.
Ecce autem continuo Mariae anima praesens visa est. Tuncque Salvator locutus est dicens: Surge, veni, dilecta mea, tabernaculum gloriae vasculum vitae. Pulchra es, amica mea, et macula non est in te,2 sicut ergo labem non habuisti, ita et corporis resolutionem minime patiaris. Statimque ad corpus accessit Mariae anima et de tumulo prodiit in corpore glorioso. Tandem sepulchrum aperientes, corpus minime invenerunt, sed tantummodo vestimenta funebria et sindonem reperunt. Igitur apostoli osculantes sepulchrum sanctum et Deum laudantes, in Hierusalem sunt reversi dicentes, quia corpore et anima Virgo gloriosa est in caelum assumptam cuius assumptionis modum devotius in sequentibus contemplemur.
Plura alia circa hanc materiam reperiuntur in historiis descripta, quae quantum ad devotionem non adeo deserviunt, ob brevitatem sunt hic praetermissa.