Szerkesztés alatt
ST 10.4
Pars quarta libri decimi,
scilicet de assumptione Beatae Mariae iuxta processum evangelii ipsius
solemnitatis, in quo mysterium activae contemplativae et fruitivae significatur
Maria optimam partem elegit, quae non auferetur ab ea. Haec verba sunt salvatoris nostri, Luc. X. ca.,1 et in evangelio hodiernae sollemnitatis lecta, quae verba secundum litteram licet sint de Magdalena dicta, tamen sancta ecclesia accipit haec verba ad laudem Beatae Virginis Mariae, et canit in huius assumptionis festivitate. Haec quippe est illa dies benedicta, in qua gloriosa Dei Mater optimam illam vitam fruitivam, scilicet caelestis patriae intravit, in qua optimam partem beatitudinis super omnem puram creaturam ascendendo accepit, quae non auferetur ab ea in aeternum. Et ideo pro eius hodierna gloria dignum est, ut omnes nos exsultemus et laetemur et demus gloriam Deo. Sicuti etiam omnes angeli et caeli cives hodie exsultando laudem Deo, et sanctae eius genitrici decantaverunt, ut canit ecclesia. Assumpta est – inquit – Maria in caelum, gaudent angeli laudantes, benedicunt Dominum etc.
Ad quod quidem hortatur nos gloriosus ille, Hieronymus in sermone De assumptione ita dicens: Hodie namque gloriosa super Virgo Maria caelos ascendit, rogo gaudete, quia ut ita fatear ineffabiliter sublimata, cum Christo regnat in aeternum, regina mundi hodie de terris et de praesenti saeculo nequam erupitur. Iterum dico gaudete, quia secura de sua immarcescibili gloria ad caeli iam pervenit pallacium. Exultare – inquit – ac gaudete et laetetur omnis orbis, quia nobis hodie omnibus eius intervenientibus meritis salus aucta est, et infra subdit dicens sic, quia – inquit – iter salutis nostrae in laudibus est salvationis hortor vos, et commoneo in hac sacra sollemnitate genitricis Dei Mariae, nolite cessare a laudibus, quod si Virgo es, gaude, quia meruisti esse, et tu, quod laudas, tantum cura, ut sis, quae dignae laudare possis. Quod si continens es et casta venerare et lauda, quia non aliunde constat, ut possis esse casta, quam ex gratia Christi, quae plenissime fuit in Maria, quam laudas, quod si coniugata certe es aut peccatrix, nihilominus confitere et lauda, quia inde omnibus misericordia profluxit et gratia, ut laudent, et quamvis non sit speciosa laus in ore peccatoris noli cessare a laude, quia inde promittitur tibi venia unde et omnibus, ut laudes haec Hieronymus, ubi supra.
Itaque ad laudem et gloriam ipsius Beatae Virginis hoc tria mysteria notabimus, secundum quod in evangelio ipso festivitatis hodierne ipsa de tribus figuraliter commendatur et laudatur:
- 1. de vita activa, significata in Martha etc.
- 2. de vita contemplativa, significata in Magdalena
- 3. de vita fruitiva, significata in parte optima.