Szerkesztés alatt
ST 10.2
Pars secunda libri decimi
de sublimatione praecellenti gloriaque felicissima, qua est honorifice
intronizata Maria in assumptione
Astitit regina a dextris tuis in vestitu deaurato, circumdata varietate, Ps. XLIV.,1 quibus in verbis sanctus David Spiritussancto afflatus Beatissimae Virginis Mariae laudem et gloriam praemagnificam in caelesti patria, ad quam hodie est assumpta, insinuat tripliter:
Primo quidem insinuat dignissimum locum et thronum regium, ad quem est exaltata, cum dicit: Astitit regina, id est Beatissima Maria a dextris tuis, scilicet o Christe, Filii Dei. Revera dignissimus locus est caeli empirei, ubi Christus est in dextra Dei Patris sedens, ubi ad dextram Filii astat Beata Virgo. Hoc quippe astare a dextris est honorem filii sui singulariter et prae aliis creaturis participare, secundum quod honor Filii aliquo participative redundat in ipsam in quantum est Mater Dei, ut vult Tho. tertio scripto sententiarum di. XXII. q. III. Itaque summa gloria est Mariae, quia cum Christo est in loco caeli sublimissimo et dignissimo ac amenissimo, ut vult Alex. de hales in III. parte sui voluminis, hoc est, quod dicit David: Astitit regina a dextris tuis.
Secundo insinuat felicissimum gloriae habitum, quo est praedotata, cum subdit in vestitu deaurato. Nimirum aurum prae aliis metallis est pretiosius et caelice, id est solari luciditati, conformius atque incorruptibilius. Nam et rubiginem non contrahit, et leprae corruptionem in cibo sumptum mundat, et foetorem anhelitus in ore tentum tollit et sedat, ut dicit Dyascorides, et ideo per aureum vestimentum significatur gloriae Beatae Virginis summa prae caeteris sublimitas, luminositas, et ad Christi gloriam conformitas, qui est sol iustitiae, nec non omnis corruptionis alienitas.
Tertio psalmus insinuat ad gloriam Mariae gloriosissimum sanctorum omnium obsequium, quo a cunctis est venerata, cum dicit circumdata varietate, videlicet sanctorum et virtutum caelestium, a quibus laudatur et extollitur. O quis valeat talem et tantam dominam gloriosissimam sufficienter laudare, quae in sublimissimo caeli solio est intronisata, summa gloria felicitata, et ab omnibus sanctorum agminibus collaudata, ac honorifice magnificata! Perfecto teste Hieronymo in eius laude deficit omnis mens et lingua, nec sufficiunt, etiam si mille forent hominum ora. Verumtamen conformando nosipsos caelesti patriae ac militanti ecclesiae, ipsam laudando humiliter et devote illud, quod canitur, depromamus. Felix namque es sacra Virgo Maria, et omni laude dignissima, quia ex te ortus est sol iustitiae, Christus Deus noster, et ut cum devoto orem Bernardo: „Ipsa voluntaria oris mei beneplacita faciat sibi, genitrix Dei, domina mundi, regina caeli, quae astitit hodie a dextris Christi in vestitu deaurato, circumdata varietate.”
Ad cuius laudem et honorem iuxta praemissa notabimus in hoc sermone tria praecipua mysteria de eius gloriosa assumptione:
- Primum dicitur dignissimae intronizationis
- Secundum dicitur felicissimae glorificationis
- Tertium dicitur honoratissimae susceptionis.