Szerkesztés alatt
Articulus tertius, quod
Beata Maria per gladium doloris aureolam martyrii meruit
Tertium mysterium de aureolae beatitudine, nam iuxta praemissa quaestio occurrit, utrum Beata Maria habeat gloriosam aureolam martyrii in caelo. Nimirum cum aureola debetur in caelo, non voluntati quidem, sed actui, ut tenent concorditer doctores super IV. Sententiarum. Quomodo wrgo Beata Virgo aureolam habet, in qua non fuit actus martyrii, quia ipsa non sustinuit pro Christio morte illatam per martyrium, ut dicit Ambrosius: Nec littera – inquit – docet, nec historia Marian gladio vitam finivisse.
Respondetur, quod Beata Virgo Maria meruit habere in caelesti praemium omnium aureolarum praemia, ut tenent concorditer doctores et praecipue probat Magnus Albertus super „missus est” c. CXIX. Unde ponitur pro conclusione, quod scilicet Beata Virgo Maria praefulget in caelesti gloria, martyrii felicissima aureola. Et haec conxlusio declaratur, nam ut dicit in obiectione ipsius virginis martyrium, quamvis non fuerit secundum actum martyrii per mortem illatam corporaliter et materialiter consummatum. Tamen quia habuit Virgo summum dolorem in anima, et sic excessivum martyrium et eius aureolam felicissimam prae martyrio omnium aliorum martyrum praeponderantem habere dinoscitur, praecipue saltem triplici ratione:
- Primo quia eius martyrium est multiplicius
- Secundo quia nobilius vel dignius
- Tertio quia gloriosus.
Primo quia Beatae Virginis martyrium fuit multiplicius, nam alii martyres passi sunt simplicius martyrium. Ipsa autem Beata mater Dei passa est quintuplex videlicet martyrium doloris, compassionis, divini sermonis, voluntatis et memorationis.
Primo dixi martrium doloris, de quo Luc. II.: Tuam ipsius animam pertransibit gladius. Unde Damascenus dicit: Ipsa Beata dolores, quos effugit pariens et moriens, hos in Christi passione sustinuit a maternali compassione, viscerum lacerationem tolerans et quem Deum cognovit per nativitatem, hunc ut maleficum, interfectum videns gladio ceu cogitationibus lacerabatur. Haec ille.
Secundo passa est martyrium compassionis in multis tribulationibus et vulneribus Christi, qui fuit martyr martyrum et ultra haec, quia vulnus lateris virgo sola suscepit in corde doloroso. Nam anima Christi iam tunc decesserat a corpore, scilicet anima Mariae erat in corpore filii per amorem plus, quam in corpore proprio, quia anima plus est ibi, ubi amat, quam ubi animat secundum Hugonem, ergo etc. Unde Bernardus in sermone de annunciatione dicit sic: Vere tuam, o Beata mater animam gladius pertransivit, quando crudelis lancea filio iam mortuo latus aperuit, ipsius nimirum anima iam ibi non erat, sed tua plane avelli nequiebat, ut plus, quam martyrem te non immerito praedicemus, in qua sensum corporeae passionis excessit affectus compassionis. Haec ille.
Tertio martyrium divini sermonis, quod fecit gladius illius sermonis Christi dicentis in cruce: Mulier, ecce filius tuus. Bernardus ubi supra: An non plusquam gladius fuit sermo ille. Mulier ecce filius tuus fuit: revera pertransiens animam et pertingens usque ad divisionem spiritus etc.
Quarto martyrium voluntatis, qua iuxta crucem stans parata fuit Virgo pro Christo et pro salute hominum martyrum pati, ut dicit Ambrosius super Luc. et etiam Anselmus.
Quinto passa est martyrium memorationis, et hoc non tam momentaneae vel brevis temporis, sed diuturnae passionis, tum quia a pueritia Iesu semper exspectavit in se impleri prophetiam Siemonis de gladio doloris, tum quia post passionem Christi semper in memoria habuit et ex hoc amoris Christi desiderio.
Secundo martyrium Beatae Virginis fuit nobilius prae aliis marytris. Ideo quoque aureola dignissimum, quia passa est in anima, quae multo nobilior est corpore, unde multo nobilius fuit Virgini pati in anima pro Christi amore martyrium. Proinde Hieronymus in sermone de assumptione dicit: Alii sancti pro Christo passi sunt in carne, Beata Virgo in ea parte sui passa est, quae impassibilis et immortalis habere, hoc est in anima. Idcirco ut verum fatear, plusquam martyr fuit, quia atrocius passa est, dum passionis Christi gladium in anima sustinuit. Haec ille.
Tertio martyrium Virginis fuit gloriosus, quod sic ostenditur secundum Albertum, quia aureola martyribus debetur pro eo, quod animam dederunt, sed hoc fecit Maria gloriosus prae ceteris. Primo quia dedit pro salute mundi praedilectissimam animam, id est vitam filii sui, quam incomparabiliter praedilexit, quam Petrus vel alius martyr propriam animam suam. Secundo quia dedit praeciosissimam animam, scilicet Christi, quae datio fuit pretium totius mundi. Tertio, quia alii dederunt corpus et animam. Beata irgo autem dedit ad crucem corpus et animam et divinitatem, ergo patet, quod inproportionabiliter gloriosus accepit in praemio aureolae. O igitur gloriosissima, ora pro nobis Christum! Amen.